दाल बाटी-Dal Bati

Read this recipe in English

सर्व्हिंग: १०  बाट्या

साहित्य:

१ १/२ कप गव्हाचं पीठ
१/२ कप रवा
१/२ कप तुपाचे मोहन ( वितळलेलं ) 
१/४ बेकिंग पावडर
१ टीस्पून मीठ
१/२ टीस्पून ओवा
१ टीस्पून जिरे
तूप

कृती:

१.  एका ताटात गव्हाचे पीठ,रवा,बेकिंग पावडर, जिरे, ओवा आणि मीठ एकत्र करून घ्या.

२. त्यात तुपाचे मोहन घालून हाताने कालवून घ्या. गार पाण्याने  घट्ट पीठ मळुन घ्या. 

३. मळलेले पीठ १ तास झाकून ठेवा.एकीकडे दाल बनवून घ्या. नंतर पीठाचे २" चे गोळे करा. हाताच्या तळव्याने दाबून किंचित चपटे करा. इंदोरकडे अशा चपट्या बाटीला बाफले म्हणतात.
४. इडली स्टँडला  तेलाचा हात लावून  हे गोळे ठेवा. इडलीपात्रात ठेवून इडलीसारखे १० मिनिटे वाफवून घ्या.
५. वाफवलेले गोळे थोडे थंड झाले कि, प्रत्येक गोळ्यावरून  किंचित तेल सोडा. ४५० F तापमानाला ओव्हन प्रीहीट करा.बेकिंग ट्रेला तेलाचा हात लावून त्यावर अंतर अंतरावर गोळे ठेवा आणि एकूण ३५ -४० मिनिटे बेक करा.साधारण १५ मिनिटांनी गोळे उलटा आणि आणखीन १५ ते २० मिनिटे गुलाबी रंग येई पर्यंत बेक करा. बेक होताना बाटीला थोड्याश्या भेगा पडतील.

५. बाटीचा वरचा भाग कडक असतो आणि आतून मऊ असते. गरम गरम बाटी कापडात धरून हाताने फोडा.एका बाउलमध्ये  फोडलेली बाटी (बाटीचा चुरा) घ्या. त्याच्यावर १/२ वाटी तूप ओता २-३ मिनिटांनी  तूप छान मुरेल.त्यावर दाल घाला आणि गरम गरम दाल बाटी सर्व्ह करा. सोबत कच्चा कांदा सर्व्ह करा.

टीप:
दाल-बाटी मध्ये तूप भरपूर वापरा तरच दाल-बाटी छान लागेल.
बरेच जण बेक करायच्या आधी उकळत्या पाण्यात बाट्या सोडून १० मिनिटे शिजवून घेतात. पण त्यामुळे वरचे कवच मऊ पडून पीठ पाण्यात मिक्स होते आणि वाया जाते त्यामुळे मी बाट्या इडली स्टँडवर वाफवून घेतल्या होत्या.