खेकडा भजी(कांदा भजी)-Kanda Bhaji

पाऊस म्हटलं कि आठवतो ओल्या मातीचा सुगंध, हवेतला गारठा, हिरवागार निसर्ग, क्वचित दिसणारे इंद्रधनुष्य, एखादं रोमँटिक गाणं
आणि आठवते कांदा भजी !
कांदा भजीची खरी आवड निर्माण झाली ती सिंहगडावर. कित्येकवेळा सिंहगडावर जायचं ठरलं कि, ए... आणि कांदा भजी पण खाऊया हे वाक्य ठरलेलं :-)

अशी हि सगळ्या महाराष्ट्राची आवडती कांदा भजी...


Read this recipe in English
सर्विंग: ८ ते १० भजी

साहित्य:
१ मोठा कांदा
१ टीस्पून लाल तिखट
१/४ टीस्पून हळद
१/४ टीस्पून साखर
१/२ टीस्पून मीठ
१ टेबलस्पून तांदळाचं पीठ
कांद्यात मावेल तितके बेसन अंदाजे ३ टेबलस्पून बेसन
१ टीस्पून कडकडीत तेलाचे मोहन
तळण्यासाठी तेल

कृती:
१. कांदा उभा आणि पात्तळ चिरा.
२.त्यात मीठ - साखर,हळद तिखट ,बेसन आणि तांदळाचे पीठ घालून हाताने मिक्स करा.
३. कढईत तेल गरम करा. तेल चांगले तापले कि १ चमचा गरम तेल मिश्रणात घाला.गॅस बारीक करा.१ टेबलस्पून मापाने थोडे थोडे मिश्रण कढईत अंतरा-अंतरावर सोडा. मंद आचेवर लालसर रंग येईपर्यंत भजी तळा.
४. भजी बरोबर आवडीप्रमाणे लसणीची सुकी चटणी किंवा टोमॅटो केचप द्या.

टीप: कांद्यात मावेल इतकेच बेसन घाला. जास्ती बेसन घातले तर भजी आतून कच्ची राहील आणि कुरकुरीत होणार नाही