व्हेज मंचुरियन-Veg Manchurian

सर्व्हिंग: २ ते ३ माणसांसाठी

साहित्य:
मंचुरियन बॉल्ससाठी-
१ गाजर किसून
४-५ कोवळी फरजबी बारीक चिरून
१/४ कप बारीक चिरलेला फ्लॉवर
१/४ कप बारीक चिरलेला कोबी
१/४ कप बारीक चिरलेली कांद्याची पात
१ टीस्पून किसलेलं आलं
१/४ टीस्पून मिरपूड
१ टेबलस्पून सोया सॉस
१ चिमुट अजिनोमोटो
१ टीस्पून चिली सॉस
१ टीस्पून विनेगर
१/४ टीस्पून साखर
१/२ कप साधा भात
४ ते ५ टेबलस्पून मैदा
मीठ चवीप्रमाणे
तळ्ण्यासाठी तेल
मंचुरियन सॉस साठी-
२ कप व्हेजिटेबल स्टॉक
१/४ कप डार्क सोया सॉस
१ हिरवी मिरची
१ टीस्पून बारीक चिरलेलं आलं
१ टीस्पून बारीक चिरलेली लसूण
१ चिमुट अजिनोमोटो
१ टीस्पून साखर
२ टीस्पून विनेगर
२ टीस्पून चिली सॉस
१/२ कप बारीक चिरलेला कांदा
१/४ कप बारीक चिरलेली कांद्याची पात
१/४ कप उभी चिरलेली भोपळी मिरची
१/४ कप बारीक चिरलेला कोबी
१ १/२ टेबलस्पून कॉर्नफलोर
२ टेबलस्पून तेल
मीठ चवीप्रमाणे

कृती:
१. मंचुरियन बॉल्ससाठी दिलेल्या सगळ्या भाज्या एका पातेल्यात घ्या. पातेल्यात १ १/२ कप पाणी आणि १/४ टीस्पून मीठ घाला आणि झाकण ठेवून भाज्या वाफवून घ्या.
२. दुस-या पातेल्यावर एक कॉटनचे पात्तळ (सुती) कापड घाला आणि कापडावर वाफवलेल्या भाज्या पाण्यासकट ओता. कापड चारही बाजूंनी धरून भाज्या घट्ट पिळून घ्या. खाली गळलेलं पाणी (व्हेजिटेबल स्टॉक) मंचुरियन सॉस बनवण्यासाठी बाजूला ठेवून द्या.
३. घट्ट पिळून घेतलेल्या भाज्यांमध्ये किसलेलं आलं, मिरपूड,विनेगर, चिलीसॉस, सोया सॉस, अजिनोमोटो, साखर, मीठ, विनेगर, साधा भात आणि मैदा घाला. मिश्रण हाताने छान कालवून घ्या. मिश्रणाचे १ १/२" चे बॉल्स करून घ्या. गरज वाटल्यास आणखीन थोडा भात आणि अजून थोडासा मैदा घाला.
४. कढईत तेल गरम करा आणि मंचुरियन बॉल्स ब्राऊन रंगावर तळून घ्या. मगाशी बाजूला ठेवलेल्या व्हेजिटेबल स्टॉक मध्ये १ १/२ टेबलस्पून कॉर्नफ्लोर घालून गुठळ्या होऊ न देता ढवळून घ्या.
५. आता पातेल्यात २ टेबलस्पून तेल गरम करा. तेल तापले कि त्यात बारीक चिरलेलं आलं,बारीक चिरलेली लसूण घालून परता. लगेचच कांदा घालून परता.
६. नंतर हिरवी मिरची, भोपळी मिरची,कोबी घालून परता. विनेगर,सोयासॉस, चिली सॉस, साखर आणि अजिनोमोटो घालून परता. बारीक चिरलेली कांद्याची पात घाला.
७. व्हेजिटेबल स्टॉक आणि कॉर्नफ्लोरचे मिश्रण घालून ढवळा. मिश्रणाला उकळी येईल तसा मंचुरियन सॉस जाड व्हायला लागेल. सॉस सेमी ट्रान्सपरंट झाला याचा अर्थ सॉस तयार झाला. चव बघून मीठ घाला.त्यात मंचुरियन बॉल्स घालून व्हेज मंचुरियन राइस किंवा नुडलस बरोबर सर्व्ह करा.

टीप: मंचुरियन बॉल्स घातल्यावर मंचुरियन ग्रेविमध्ये बॉल्स १/२-१ तास मुरु द्यावे. म्हणजे खाताना जास्ती मजा येईल.
ड्राय मंचुरियन करायचे असेल तर व्हेजिटेबल स्टॉक आणि कॉर्न फ्लोर घालायच्या आधीच्या स्टेप पर्यंत (no . ६) सॉस बनवून त्यात बॉल्स मिक्स करा.