मिसळ-पाव- Misal Pav

Read this recipe in English
सर्व्हिंग: ३ ते ४ माणसांसाठी

साहित्य : 

उसळी साठी-
२ कप मोड आलेली मटकी
३/४ वाटी बारीक चिरलेला कांदा
१/४ टीस्पून मोहरी, १/४ टीस्पून हिंग, १ टीस्पून लाल तिखट , १/४ टीस्पून हळद,
१ टीस्पून गोडा मसाला
२ टेबलस्पून तेल
मीठ चवीप्रमाणे

फोडणीच्या पोह्यांसाठी-
२ मुठी जाड पोहे
१/२ कप बारीक चिरलेला कांदा
१ हिरवी मिरची ,१/४ टीस्पून मोहरी, १/४ टीस्पून हिंग
मीठ, साखर चवीप्रमाणे

बटाट्याच्या  भाजीसाठी-

१ उकडलेला मध्यम बटाटा

१/४ कप कांदा

१/४ टीस्पून हळद

मीठ चवीप्रमाणे

१ हिरवी मिरची

१/४ टीस्पून जिरे

१ चिमुट हिंग  

२ टेबलस्पून तेल 

कट बनवण्यासाठी-
७-८ कप पाणी
२ टीस्पून आलं-लसूण पेस्ट
२ टेबलस्पून भाजलेलं सुकं खोबरं
१/२ कप बारीक चिरलेला कांदा

२ १/२ टोमॅटो बारीक चिरून,
२ टीस्पून लाल तिखट
१/४ टीस्पून हळद
१ टीस्पून चिंचेचा कोळ
चिमुटभर साखर
मीठ चवीप्रमाणे

२ कप फरसाण, शेव-पात्तळ पोहे चिवडा
१/२ कप टोमॅटो बारीक चिरून
१/२ कप कोथिंबीर
१/४ कप चिंचेची गोड चटणी( optional )
१/४ कप दही (optional )
६-८ लादी पाव

कृती : 

१. बटाटा उकडून त्याच्या बारीक फोडी करून ठेवा. कांदा चिरून ठेवा. पोहे भिजवून त्यांना मीठ हळद साखर लावून ठेवा.
२. मटकी ७-८  कप पाण्यात घालून गॅसवर शिजवत ठेवा.
३. १०-१५ मिनिटे पाणी चांगले उकळले कि मटकी शिजेल. ती बाजूला काढून ठेवा. उरलेले पाणी बाजूला ठेवा.
नंतर कट करण्यासाठी त्याच पाण्याचा वापर करा. म्हणजे कट जास्ती टेस्टी लागेल.
४. उसळी साठी -
एका पातेल्यात तेल तापवून हिंग-मोहरीची फोडणी करा. कांदा परता.
मग मटकी घाला.हळद, तिखट, गोडा मसाला घाला. मीठ घालून २ वाफा आणा. उसळ बाजूला ठेवा.
५.झणझणीत तिखट कटासाठी -
पातेल्यात तेल तापवून कांदा फोडणीला घाला. आलं-लसूण पेस्ट घालून परता. खमंग वास सुटला कि १-२ मिनिटे सुकं खोबरं परता आणि मग कांदा-टोमॅटो घालून परता. लाल तिखट हळद मीठ घाला. तेल सुटे पर्यंत परता. मटकीचे उरलेले पाणी घाला.मीठ आणि चिंचेचा कोळ घाला. चिमुटभर साखर घाला. उकळी काढा. कटाचा तिखटपणा आवडी प्रमाणे कमी जास्त करा.
६. फोडणीच्या पोह्यांसाठी-
कढईत तेल गरम करून हिंग मोहरीची फोडणी करा. हिरवी मिरची तुकडे करून घाला.कांदा घालून परता. नंतर भिजवलेले पोहे घालून परता. १-२ वाफा आणा.

७.बटाट्याच्या भाजीसाठी-
कढईत  तेल गरम करा आणि जिरे आणि हिरवी मिरची तुकडे करून  फोडणीला घाला. कांदा घालून परता.हळद घाला.कांदा शिजला कि बटाट्याच्या फोडी घाला.मीठ घालून १ वाफ आणा.

८.मिसळीची डिश तयार करा. सर्वात आधी खाली फोडणीचे पोहे घाला. वरती बटाट्याची  भाजी, मटकी उसळ, कांदा-टोमॅटो आणि कट घाला.थोडी गोड चटणी. आणि सर्वात वरती फरसाण घाला. कोथिंबीर घालून पावाबरोबर सर्व्ह करा.

मिसळीसाठी क्रम
१. तळाला पोहे
२. त्याच्यावर बटाट्याची भाजी
३. मग मटकीची उसळ
४. कांदा
५. तर्री (कट)
६. सर्वात वरती फरसाण

टीप : कटाचा तिखटपणा मिसळ खाताना सगळं एकत्र झालं कि कमी वाटतो. त्याप्रमाणे कटाचा तिखटपणा वाढवावा.