इंदोर कचोरी-Indore Kachori

Read this recipe in English
सर्व्हिंग: १०-१२ कचो-या

साहित्य: 
कव्हरसाठी-
१/४ कप + २ टेबलस्पून मैदा
१/४ कप + २ टेबलस्पून गव्हाचं पीठ
१ १/२ टीस्पून बेसन
१ चिमुट साखर
१/२ टीस्पून मीठ
३ टेबलस्पून कडकडीत तेलाचे मोहन
सारणासाठी-
१/४ कप मुगाची डाळ ( १ तास भिजवत ठेवा.)
४ टेबलस्पून बेसन+ २ टीस्पून तूप
१ टीस्पून धने, १ टीस्पून जिरे, १ टीस्पून बडीशेप
३ टेबलस्पून सुकं खोबरं
१ टीस्पून लाल तिखट
१/४ टीस्पून आमचूर
३ ते ४ टीस्पून साखर
मीठ चवीप्रमाणे
फोडणीसाठी-१/४ टीस्पून मोहरी, १/४ टीस्पून हिंग, ६-७ कढीपत्ता पाने चिरून 

तळण्यासाठी तेल
सारण-

कृती: 
१. प्रथम सारणासाठी- भिजत घातलेली मुगाची डाळ मिक्सरवर कमीत कमी पाणी घालून बारीक वाटून घ्या.
२. कढईत सुकं खोबरं, धने,जिरे आणि बडीशेप एकत्र करून ब्राऊन रंग येई पर्यंत खरपूस भाजून घ्या. भाजून झाल्यावर हातानी चुरडून किंवा कुटून घ्या.
३. कढईत तूप गरम करा आणि त्यावर तांबूस रंग येई पर्यंत बेसन खमंग भाजून घ्या. बेसनाचा खमंग वास यायला लागला कि गॅस बंद करा.
४. भाजलेले बेसन आणि खोब-याचे मिश्रण एकत्र करा. त्यात लाल तिखट,आमचूर मीठ आणि साखर घाला.
५. पातेल्यात तेल गरम करा. तेल तापल्यावर मोहरी आणि कढीपत्ता याची फोडणी करा. हिंग घाला आणि लगेचच वाटलेली मुगाची डाळ घालून परता.डाळ कोरडी होई पर्यंत परतत रहा. डाळ कोरडी झाली कि खोबरे आणि बेसन मिक्स केलेलं मिश्रण घालून परता. ३-४ मिनिटे परता. सगळं जिन्नस छान एकत्र झालं पाहिजे. नंतर गॅस बंद करा. मिश्रण गार होऊ द्या.

६. कव्हरसाठी - गव्हाचं पीठ, मैदा मीठ आणि साखर हाताने एकत्र करून घ्या.कचोरी खुसखुशीत होण्यासाठी ३ टेबलस्पून तेल(मोहन) धूर येई पर्यंत कडकडीत गरम करा आणि पिठात ओता. चमच्याने तेल (मोहन) पिठात मिक्स करा.

७. गार पाण्याने पुरीला मळतो तितके घट्ट पीठ मळुन घ्या.(लाटताना चिकटणार नाही इतपत घट्ट) पीठ छान मुरण्यासाठी १ तास झाकून ठेवा.

८. पीठाचे १ " चे गोळे करा आणि पुरीच्या आकाराइतके ( ३" व्यास) आणि १ mm जाडीला  असेल असे लाटून घ्या. खूप पात्तळ किंवा खूप जाड लाटु नका. 

९. सारण मुठीत घेऊन दाबून त्याचा १ १/२" आकाराचा गोळा बनवा.पुरीच्या मध्यभागी सारणाचा गोळा ठेवा. आणि सगळ्या बाजूने गोळा झाकून बंद करून घ्या. किंचीतसेही सारण बाहेरून दिसत कामा नये. नाहीतर तळताना कचोरी फुटण्याची शक्यता असते.

१०. सारण पुरीने झाकल्यावर जास्तीचे पीठ काढून घ्या. तळव्याने कचोरी हलक्या हाताने दाबून थोडीशी चपटी करा.
११. कढईत तेल गरम करा. तेल चांगले तापले कि गॅस बारीक करा आणि मंद आचेवर गोल्डन ब्राऊन रंग येई पर्यंत कचो-या तळा.

१२. गरम गरम कचो-या चिंचेच्या चटणी बरोबर खायला द्या.

टीप:  
१.या कचो-या हवाबंद बरणीत ८-१० दिवस टिकतात. 

२.कव्हर मध्ये जास्तीजास्त सारण भरले गेले कि कचो-या भरीव आणि छान लागतात. कव्हरच्या गोळ्या पेक्षा  सारणाचा गोळा किंचित मोठा करा.
३. कचो-या तळण्याच्या आधी कव्हरचा छोटासा गोळा तेलात टाकून तेल व्यवस्थित तापले  आहे याची खात्री करा. कव्हरचा गोळा हळू हळू तरंगत वर आला याचा अर्थ तेल तापले आहे

४. मोठ्या आचेवर कचो-या तळल्या तर त्या कुरकुरीत होणार नाहीत.